Havland investerer 200 millionar i Florø
Havland investerer for 200 millionar kroner i Florø. Finansieringa er på plass, og allereie måndag tar dei fyrste spadetak.
Frode Kupen, Oddgeir Igland, Oda Kristin Igland, Bjørn Inge Igland og Halvard Hovland
Foto: Havland
Torskeoppdrettar Havland bygger no ut og sikrar tilgangen på yngel og settefisk til torskenæringa, skriv dei i ei pressemelding.
– Havland har sikra finansiering av to store utbyggingsprosjekt på Botnaneset og Gaddholmen i Florø. Med investeringar på 200 millionar kroner skal selskapet auke kapasiteten for både yngel og sjøklar settefisk, og bidra til større og meir føreseieleg tilgang for torskenæringa i åra som kjem, fortel Oda Kristin Igland, leiar for innovasjon- og forretningsutvikling i Havland.
På Botnaneset, selskapets eldste lokalitet, skal dei bygge eksisterande areal om til ei moderne settefiskavdeling med nye hallar og teknologi for å levere større volum sjøklar settefisk.
– Det er spesielt å sjå den eldste lokaliteten vår gå inn i ein ny fase etter 26 år. Dette skaper verdi for Havland, men minst like viktig er det at vi bygger kapasitet som kjem torskenæringa og Norge til gode, seier Oddgeir Igland, konserndirektør i Havland.
På Gaddholmen skal det byggast ny hall for auka yngelproduksjon. Havland går samtidig frå to til tre produksjonssyklusar i året.
– Skal torskenæringa lykkast med vidare vekst, må det vere tilgang på nok yngel av god kvalitet. Med denne investeringa tar vi eit viktig steg for å møte behova vi ser komme, seier Oda Kristin Igland, leiar for innovasjon- og forretningsutvikling i Havland.
Dei to prosjekta inneber samla investeringar på 200 millionar kroner, og Havland har Sparebank 1 Sogn og Fjordane med på laget.
– Vi må takke banken, som er ein avgjerande finansieringspartnar for oss, skriv Havland i pressemeldinga.