Julehelsing 2023
No er det snart jul og vi kan sjå tilbake på eit innhaldsrikt og kjekt år. Ekstra gledeleg er det å melde at Symbiose Fjordane som vi begynte å jobbe med for snart to år sidan, verkeleg har begynt å spinne frå seg. Programmet skal jobbe fram fullstendige verdikjeder for handtering av organisk restråstoff og spelar ei nøkkelrolle i arbeide med overgang frå lineær økonomi til sirkulær økonomi. Det er etablert eit sterkt konsortium og fleire sirkulære satsingar og verdikjeder, mellom anna i Sunnfjord, Høyanger og Bremanger. Konsortium består av verksemder frå ulike sektorar og industrielle og regionale utviklingsmiljø, og programmet vil ta opp og samarbeide om nye sentrale initiativ og satsingar.
Med bakgrunn i FoU- møte vi arrangerte i haust med tema Fiskeslam som ressurs, er det mellom anna etablert ei eiga satsing knytt til restråstoff frå Havbruksnæringa og vi opplever stor pågang frå aktørar i denne verdikjeda. Dette er utruleg kjekt og spennande og vi gler oss til vidare arbeid. I november fekk vi også gladnyheita om at Sparebankstiftinga Sogn og Fjordane støttar Symbiose Fjordane med 1,2 millionar kroner. Tusen takk for tillitserklæringa. Med dette har vi midlar til å styrke arbeidet ytterlegare.
I oktober arrangerte vi vår nye yngleplass Hub for Future - arenaen og nettverket for nye framtidige forretningsmoglegheiter, og lanserte samtidig vår nye profil. Den er endra til ein dynamisk og aktiv profil som gjenspeglar den endringa vi står i, der vi alle må opne opp for nye tankar og idear som kan føre oss inn i ei spennande framtid. Vår rolle ovanfor våre medlemmer og samarbeidspartar er at Hub for Ocean skal vere ein koplingssentral for kunnskap og erfaring, der dristige visjonar blir til verkelegheit. Målet vårt er å dyrke eit vekstmiljø som gir grobunn for nyskaping og berekraftige verdikjeder. Vi takkar Big Fish for prosessen som har ført fram til ein profil som styrkar og støttar oss i vårt vidare arbeid på vegne av medlemmane våre. Hugs forresten å sette av datoen 10. - 11. april. Då arrangerer vi Hub for Future på Hamnehuset i Florø med tema: Samskaping i nye verdikjeder!
Avslutningsvis vil vi sei tusen takk for samarbeidet i året som har gått. Vi er audmjuke for arbeidet og viljen de legg ned kvar dag for å legge til rette for vidare næringsutvikling og arbeidsplassar. Vi ser fram til vidare samarbeid for å finne nye løysingar for ei berekraftig framtid i den blå næringa.
Med desse orda ønskjer vi dykk alle ei strålande førjulstid. Ta vare på kvarandre og vis omtanke for alle på din veg.
God jul og eit riktig godt nytt år.
Beste helsing alle frå oss i Hub for Ocean- teamet
